Minisitiri w'Ubuhinzi n'Ubworozi, Dr. Ildephonse Musafiri yageneye abahinzi n'aborozi ubutumwa bwihariye bujyanye n'igihembwe cy'ihinga cy'umuhindo cya 2024A. Ubu butumwa bukubiyemo inama zizafasha abahinzi kongera umusaruro no kwihaza mu biribwa binyuze mu guhinga ubutaka bwose bwera, gukoresha imbuto nziza, ifumbire y'imborera n'imvaruganda ndetse no gukurikirana neza ibikorwa byabo.

Soma ubutumwa bwose: 

Igihembwe cy’ihinga cy’Umuhindo cya 2024A cyatangiranye n’ukwezi kwa Nzeri 2023 gisanze Isi yose n’Igihugu cyacu tugihanganye n’ingaruka z’ibihe bidasanzwe birimo izamuka ry’ibiciro ku Isi muri rusange n’ihindagurika ry’ikirere.

Turashimira abahinzi n’aborozi imbaraga bakomeje gushyira mu bikorwa by’ubuhinzi n’ubworozi bahangana n’ingaruka z’imihindagurikire y’ibihe nkuko byagaragaye mu bihembwe bishize bya 2023A; 2023B ndetse na 2023C.

Nkuko byagaragajwe n’Ikigo cy’igihugu gishinzwe ubumenyi bw’ikirere, igihembwe cy’ihinga 2024A giteganyijwemo imvura nyinshi kurusha isanzwe igwa mu gihembwe cy’umuhindo, imvura iteganyijwe muri uyu muhindo w’umwaka wa 2023 ikaba igereranywa n’iyaguye mu muhindo wa 1997, 2002, na 2006.

Mu rwego rwo kurushaho kubyaza umusaruro iki gihembwe cy’ihinga cy’umuhindo 2024A, Minisiteri y’Ubuhinzi n’Ubworozi (MINAGRI) irasaba ubufatanye abahinzi n’aborozi, inzego z’ibanze, n’abandi bafatanyabikorwa bose mu iterambere ry’ubuhinzi n’ubworozi mu gushyira mu bikorwa ingamba zikurikira:

1. Kongera ubuso buhingwa mu buryo buhuje (Land Use Consolidation), hahingwa ibihingwa byatoranyijwe bihakwiriye, hagendewe ku bujyanama butangwa n’inzego zishinzwe ubuhinzi zibegereye;
2. Guhinga ubuso bwose bushobora guhingwa ntihagire ubutaka busigara budahinzwe haba i musozi, mu bishanga no mu nkuka zabyo, mu duhaga, ndetse no mu mibande;
3. Kwihutisha imirimo y’ihinga, gutera imbuto bigakorwa kare mu ntangiriro z’igihembwe cy’ihinga kugirango ibihingwa bizabashe kubona amazi ahagije y’imvura y’umuhindo;
4. Gufata amazi y’imvura; guhinga ibihingwa byera vuba no gutegura ibikoresho bizifashishwa mu mirimo yo kuhira, barushaho kwitabira gahunda ya Leta ya Nkunganire mu kuhira (SSIT) cyane cyane mu bice byagaragajwe ko bizagira imvura nke ugereranyije n’ahandi ndetse n’aho izacika kare, hagendewe ku makuru y’iteganyagihe ry’amezi ane (Nzeri-Ukwakira-Ugushyingo-Ukuboza 2023), ateganya ko hari aho imvura izagera ikerewe ikanacika kare;
5. Kwitabira kurushaho ikoreshwa ry’imbuto z’indobanure n’ifumbire y’imvaruganda, hamwe n’ishwagara ikenerwa mu turere dufite ikibazo cy’ubusharire bw’ubutaka, binyuze muri gahunda ya Nkunganire;
6. Kwibuka kubagara imyaka ku gihe kuko kutabagara bicura ibihingwa intungagihingwa bigatubya umusaruro, no kwibuka kongerera ibihingwa nk’ibinyampeke ifumbire ya ire (urée) nyuma yo kubagara;
7. Kwitabira kurushaho gukoresha ifumbire y’imborera nka bumwe mu buryo bwo kongera umusaruro bwunganirana n’ifumbire y’imvaruganda, no gukoresha andi moko y’amafumbire akoreshwa ku mababi (foliar fertilizers),ubushakashatsi bwagaragaje ko iyo akoreshejwe hamwe n’ifumbire mvaruganda bitanga umusaruro mwiza kurushaho;
8. Kugenzura kenshi ibihingwa no kurwanya indwara n’ibyonnyi byagaragara mu murima kugirango bitazatubya umusaruro;
9. Kwita ku bihingwa bihora mu mirima (perennial crops) nk’urutoki, ikawa, n’ibindi, harimo kubifumbira no kubiha isaso, n’izindi nama z’abashinzwe iyamamazabuhinzi zigamije kuzamura umusaruro w’ibi bihingwa;
10. Kurwanya isuri hatunganywa imirwanyasuri ndetse hanaterwa ubwatsi bufata ubutaka n’ibiti ndumburabutaka ku miringoti, kandi hasiburwa imigende y’amazi mu bishanga;
11. Gukomeza gushyira imbaraga mu kwitabira gahunda yo kororera mu biraro, kwitabira gutera ubwatsi bwo kugaburira amatungo no gutegura kare uburyo bwo kubuhunika;
12. Kwitabira gahunda yo gukingira amatungo indwara zikunze kuyibasira muri iki gihe;
13. Kurushaho kwitabira gahunda y’ubwishingizi bw’ibihingwa n’amatungo kuri Nkunganire ya Leta nk’uburyo bufasha abahinzi n’aborozi guhangana n’ingaruka z’imihindagurikire y’ikirere;
14. Kwitegura hakiri kare uburyo bwo kuzafata neza umusaruro no kuwushakira kare amasoko, abahinzi n’aborozi bakaba bashishikarizwa kugirana amasezerano n’abaguzi.

Bikorewe i Kigali kuwa 02 Ukwakira 2023

Dr. Ildephonse Musafiri

Minisitiri w’Ubuhinzi n’Ubworozi