Igihembwe cy’ihinga cy’Umuhindo cya 2022A cyatangiranye n’ukwezi kwa Nzeri 2021 gisanze Isi yose n’Igihugu cyacu bigihanganye n’ingaruka z’ibihe bidasanzwe biterwa n’icyorezo cya Koranavirus (COVID-19).

Turashimira abahinzi n’aborozi imbaraga bakomeje gushyira mu buhinzi n’ubworozi, zatumye Igihugu kigira umusaruro mwiza.

Turashimira by’umwihariko abafatanyabikorwa mu butubuzi bw’imbuto imbere mu Gihugu uruhare rwabo mu gutuma Igihugu ubu kibasha kugera ku 100% by’imbuto zikenewe muri iki gihembwe cy’ihinga ziri muri gahunda ya Nkunganire zaratuburiwe imbere mu Gihugu.

Mu rwego rwo kurushaho kubyaza umusaruro iki gihembwe cy’ihinga cy’umuhindo 2022A, Minisiteri y’Ubuhinzi n’Ubworozi (MINAGRI) irasaba ubufatanye abahinzi n’aborozi, inzego z’ibanze, n’abandi bafatanyabikorwa bose mu iterambere ry’ubuhinzi n’ubworozi mu gushyira mu bikorwa ingamba zikurikira:

1. Gukomeza imirimo y’ubuhinzi n’ubworozi hubahirizwa amabwiriza y’inzego z’ubuzima yo kwirinda icyorezo cya koronavirusi (COVID-19);
2. Kongera ubuso buhingwa mu buryo buhuje (Land Use Consolidation), hahingwa ibihingwa byatoranyijwe bihakwiriye, hagendewe ku bujyanama butangwa n’inzego zishinzwe ubuhinzi zibegereye;
3. Guhinga ubuso bwose buhingwa ntihagire ubutaka busigara budahinzwe haba i musozi, mu bishanga no mu nkuka zabyo, mu duhaga, no mu mibande;
4. Gutegura imirima hakiri kare no gutera imbuto ku gihe hakurikijwe uko imvura izaboneka hirya no hino mu Gihugu, nk’uko bigaragazwa n’amakuru y’iteganyagihe, kugira ngo ibihingwa bizabashe kubona amazi ahagije;
5. Gufata amazi y’imvura akazifashishwa igihe imvura yacika kare. By’umwihariko, tugendeye ku makuru y’iteganyagihe ry’amezi atatu (Nzeri-Ukuboza 2021), mu gice cy’Amayaga n’ Uturere twa Bugesera, Kirehe na Ngoma mu Ntara y’Uburasirazuba hateganyijwe ko imvura izagabanuka ugereranyije n’isanzwe igwa mu bihe by’Umuhindo. Abahinzi bo muri ibi bice by’Igihugu barashishikarizwa guhinga ibihingwa byera vuba kandi bakongera imbaraga mu gufata amazi y’imvura ibonetse akazifashishwa igihe imvura ibaye nke;
6. Kwitabira kurushaho ikoreshwa ry’imbuto z’indobanure n’ifumbire mvaruganda, binyuze mu kwiyandikisha muri Smart Nkunganire System nk’uburyo bwemewe muri gahunda yo kubona inyongeramusaruro zunganiwe na Leta harimo imbuto, ifumbire mvaruganda hamwe n’ishwagara ikenerwa mu Turere dufite ikibazo cy’ubusharire bw’ubutaka;
7. Kwitabira kurushaho gukora no gukoresha ifumbire y’imborera nka bumwe mu buryo bwo kongera umusaruro bwunganira ifumbire y’imvaruganda ndetse no kwitabira gukoresha ishwagara ku butaka bufite ikibazo cy’ubusharire;
8. Gukomeza kwitabira gahunda yo gukoresha imashini zihinga hagamijwe kwihutisha imirimo y’ihinga kugira ngo abahinzi be gucikanwa n’igihembwe cy’ihinga;
9. Kurwanya isuri hatunganywa imirwanyasuri ndetse hanaterwa ubwatsi bufata ubutaka n’ibiti ndumburabutaka ku miringoti, hasiburwa ibyobo bifata amazi ku mirwanyasuri kandi hasiburwa imigende y’amazi mu bishanga;
10. Kurwanya indwara n’ibyonnyi bikunze guteza abahinzi ibihombo, bitabira gutera imbuto nziza, basimburanya ibihingwa mu mirima aho gusubizamo igihingwa cyahasaruwe igihembwe cy’ihinga cyabanje, bubahiriza ibipimo batereraho imbuto kandi banakoresha imiti yabugenewe;
11. Kwitabira gahunda yo gukingira amatungo indwara zikunze kuyibasira muri iki gihe;
12. Kurushaho kwitabira gahunda y’ubwishingizi bw’ibihingwa n’amatungo kuri Nkunganire ya Leta nk’uburyo bufasha abahinzi n’aborozi guhangana n’ingaruka z’imihindagurikire y’ikirere;
13. Gutera ubwatsi bwo kugaburira amatungo no gutegura kare uburyo bwo kubuhunika;
14. Kwitegura hakiri kare uburyo bwo kuzafata neza umusaruro no kuwushakira amasoko kare, abahinzi n’aborozi bakaba bashishikarizwa kugirana amasezerano n’abaguzi;
15. Gutegura hakiri kare ubuhumbikiro bw’ingemwe z’ibireti zizaterwa mu gihembwe gitaha hagamijwe kugira ngo zizabonekere igihe;
16. Kwitabira gahunda y’iterwa ry’ingemwe za kawa zateguwe n’Inganda zitunganya kawa hirya no hino mu Gihugu, hibandwa cyane mu gusimbuza kawa zishaje no kongera ubuso buhinzeho kawa;
17. Kwitabira igikorwa cyo gutera ifumbire mvaruganda ndetse n’iy’imborera mu bipimo bya kawa no gutera imiti irwanya ibyonnyi bya kawa. Amabwiriza arambuye kuri iki gikorwa azatangwa n’Ikigo Gishinzwe Iyoherezwa mu Mahanga ry’Ibikomoka ku Buhinzi n’Ubworozi (NAEB);
18. Gutegura neza imirima mishya izaterwamo icyayi ndetse n’izasimbuzwa (gap infilling) hacukurwa imyobo yabugenewe ndetse hagateganywa n’ifumbire izateranwa n’ingemwe nshya z’icyayi.
19. Gutegura ubuhumbikiro bw’ingemwe z’icyayi zizaterwa mu gihembwe cy’ihinga cya 2023 A.

Bikorewe i Kigali ku wa 21 Nzeri 2021

Dr. Gerardine MUKESHIMANA

Minisitiri w’Ubuhinzi n’Ubworozi