Dore uko bikorwa:

1. Ibigori 

• Gutegura ibikoresho bizifashishwa mu isarura nk’amahema, ibiti bizifashishwa mu kubaka ubwanikiro, ibikoresho byifashishwa mu guhungura ibigori, imifuka, n’ibindi. Byinshi muri ibi bikoresho mushobora kubisanga ku masoko abegereye ndetse no ku bacuruzi b’inyongera musaruro.
• Gutegura  ubwanikiro, hibandwa ku gukoresha ubwanikiro busanzwe ndetse aho budahagije mukihutira kubaka ubundi bw’igihe gito mukabusakaza amahema cyangwa amabati.
• Gusarura ibigori byeze neza amahundo amaze gucurama kandi ibibabi bikaba byarumye bisa na kaki
• Gusharika ibigori bigisarurwa mu bwanikiro kugirango byume neza mbere y’uko bihungurwa
• Si byiza kunyagiza ibigori haba mu gihe bisarurwa, byanikwa, babitoranya, cyangwa igihe bihunitse
• Kirazira kwanika ibigori hasi mu gitaka
• Ibigori byumye neza birahungurwa hifashishijwe uburyo bwiza budakomeretsa intete (imashini zihungura cyangwa intoki).
• Abakusanya bakanagura umusaruro barasabwa nabo kwita kuri uwo musaruro bifashisha imashini zumisha ibinyampeke n’ibinyamisogwe aho bishoboka hose. Imashini ishyirwamo ibigori bihunguye, soya, ibishyimbo, cyangwa umuceri bikihutisha kumisha no kugira umusaruro utunganyijwe neza.
• Ibigori byamunzwe, ibifite uruhumbu, ibyamenetse n’ibyahinduye ibara bijonjorwa mu bindi kugirango umusaruro ugire agaciro.
• Ubuhunikiro bugomba kuba bwinjiza umwuka, butanyagirwa, kandi bufite isuku mu rwego rwo kwirinda ibyonnyi nk‘imungu n’imbeba.
• Abahinzi barasabwa kwizigamira ibiribwa birinda kugurisha umusaruro wose.

Abacuruzi b’inyongeramusaruro barashishikarizwa kwegereza abahinzi ibikoresho byifashishwa mu gihe cy’isarura nk’amahema n’imifuka babirangura ku bacuruzi  banini babyo bari hirya no hino mu gihugu.

Abahinzi barasabwa kwirinda kotsa imyaka, kwirinda abamamyi, n’abandi babafatirana muri ibi bihe bikaba byabateza igihombo.

1. Ibishyimbo cyangwa Soya

1. Sarura ibishyimbo/Soya byawe byeze neza ariko ubirinde kumagarira mu murima kugirango mu gihe ubisarura imisogwe itifungura ibishyimbo/Soya bigatakara.
2. Anika ibishyimbo/Soya ku bikoresho byabugenewe kandi bifite isuku;
3. Hurira ibishyimbo/Soya ku mbuga iriho sima cyangwa ihema
4. Anika ibishyimbo/Soya kugeza byumye neza; hanyuma utoranyemo ibitameze neza (ibyangiritse, ibyamunzwe, ndetse n’ibindi bitari ibishyimbo (amabuye, ibyatsi….)
5. Bihungire ubishyire mu mifuka ubitereke ahantu hasukuye kuri parete (palletes) kandi hafite ubuhehere buringaniye

Hirya no hino mu gihugu hubatswe hangari zifashishwa mu gusharika ibigori. Izi hangari ni nini kandi zifasha ibihingwa byanitsemo kutagerwaho n’amazi ashobora kubyangiza. Abahinzi barakangurirwa kwifashisha izo hangari aho bishoboka hose, banikamo ibishyimbo byabo mu gihe nta bigori bikirimo. 

Imbuga za sima ziri imbere ya hangari zakwifashishwa mu guhura ibishyimbo, kubigosora, kubyanika, ndetse no kubitoranya.

Ku bindi bisobanuro, mwakwegera abajyanama b’ubuhinzi, abafashamyumvire, abashinzwe ubuhinzi mu tugari, mu mirenge, mu turere, cyangwa mwegere abakozi b’ Ikigo cy'Igihugu gishinzwe guteza imbere Ubuhinzi n'Ubworozi (RAB) kugirango babafashe.

Mwanahamagara kandi ku murongo wa telefone utishyurwa wa MINAGRI kuri 4127 mugasaba izindi nama mukeneye.